Disparition de Denise Tourillon

DESPARTIDA

Es ambe fòrça tristesa que vos devèm anonciar la despartida, le 3 de març de 2020, de Denisa Missa-Tourillon, l’aderenta mai vièlha de la nòstra associacion.
Denisa Tourillon èra nascuda le 28 de març de 1923. Era la filha d’un artisa pintre e la felena d’un musician del costat del siu paire. Era originària d’Olt per la siu maire, de Laròca-Toirac.
Fèc les sius estudis al licèu Clément Marot de Cáurs e agèc la siu licéncia de letras a París, puèi un diplòma d’Estudis superiors de letras.
Era una poetessa d’elèit e nos brembarem totjorn dels tèxtes que nos legissiá a las nòstras sesilhas del dissabte al Panthéon.
Publiquèc sèt recuèlhs de poèmas que fusquèc guierdonada mai d’un còp : en 1933 agèc una medalha d’aur al concors europenc de poesia (la medalha li fusquèc remesa per Paul Guth), en 2002 fusquèc premiada (segond prèmi) al concors internacional de Poesia francofòna, le 3 de mai de 2004 obtenguèc le prèmi de la fondacion Fayolle als Jòcs florals de Tolosa.
Retendrem, en particular, aquestas publicacions : Le pas suspendu (2002), Le Guetteur d’argile (1983), Reflets d’ombre (2017), Le sentiment historique de Mistral dans Nerto. Les Amics de la lenga d’Oc publiquèren la conferéncia que fèc le 5 de març de 1965 : L’amour courtois, amour adultère (Collection des amis de la langue d’oc, 1965. 39 pages). Ne fasquèc tanben una autra sul « Diable dans Nerte » e tantas autras.
Denisa Tourillon venguèc als Amics de la lenga d’Oc en 1956, mercés al professor Jean Boutière ( 1898 –1967) que seguissiá les sius corses a la Sorbona. Jean Boutière, romanista plan conegut, autor, entre autras causas, d’una edicion de Las vidas dels trobadors, fusquèc le director del Centre d’enseignement et de recherche d’oc (CEROC) que creèc en 1948.
Era un plaser vertadièr d’escotar Denisa Tourillon evocar les aderents de la nòstra associacion qu’aviá conegudis, coma André Chamson, Pierre-Louis Berthaud, Jean Lesaffre e Ivan Gaussen, per exemple. Era un pauc la memòria dels Amics de la lenga d’Oc. Amb ela, es tota una part de l’istòria de la nòstra associacion que se’n va.
Presentam totas las nòstras complantas esmòugudas a la siu familha.
A Denisa Tourillon, me pensi que li auriá agradat aqueste numerò del Vira-Solelh consacrat en partida a la poesia de Josèp Loubet, le nòstre fondator.

Majoral J.-F. C.