La Société des Félibres de Paris - Les Amis de la langue d’oc

AG 2013-16 de novembre

dimècres 1r de genièr de 2014, per  Francis d’Abrigeon

RENDUT-COMPTE DE L’ACAMP GENERAL DEL 16 de NOV. de 2013

L’acamp general annadièr estatutari de la Societat dels Felibres de París se debanèt lo dissabte 16 de novembre de 2013 a l’Universitat del Panthéon, sala 110, jos la presidéncia del capiscòl, Joan-Francés Costes (15 oras 30-16 oras 30) Èran presents 6 sòcis del Conselh elegits de 2008 a 2011 e 3 sòcis fòra del Conselh demest los quaranta qu’avián pagat son escotisson. Tres socis èran desencusats, que balhèron son poder al capiscòl. Atal, l’acamp poguèt valablament deliberar. Secretari de sesilha : F d’Abrigeon, secretari general , que redigiguèt aquel rendut-compte.

I-RENOVELAMENT DEL CONSELH D’ADMINISTRACION

Dos sètis èran de renovelar : los de Gui MATIEU e de Alexis QUENTIN G. Matieu foguèt tornar elegit e A.Quentin, absent aquel jorn e qu’a pas renovelat son adesion a l’associacion, foguèt remplaçat per Edmond Romieu. Decision presa a l’unanimitat. Lo conselh, modificat, es doncas compausat atal : - 9 sòcis elegits que son, dins l’òrdre alfabetic : F. d’Abrigeon, A. Birot, J-F. Costes, G. Ligozat, G. Mathieu, S.Odin, E.Romieu, D.Tourillon e D.Viargues - 3 sòcis onoraris : lo majoral R. Rousset, lo majoral e rèire-capiscòl J. Fourié e lo rèire-capiscòl A. Armengaud. S’amassarà lo dissabte 14 de decembre que ven a 14 oras precisas per elegir lo burèu.

II - RAPÒRT D ’ACTIVITAT

Lo secretari general, Francés d’Abrigeon, legiguèt lo rapòrt d’activitat per l’annada 2012-2013 qu’escriguèt : una evocacion de nòstres sièis acamps mesadièrs a Paris-Panteon, amb las charradissas de Martin Motte (Mistral e la Provença maritima), Peireta Berengier (Xavier de Forvièras), Gui Mathieu , acompanhat per Domitilla Vigneron (sos poèmas de « Naissença de Miejanuech »), Krystel Maurin (Fabre d’Olivet), Brigitte Saouma (Sant Bernard e los trobadors), e, tornamai Martin Motte (W.Bonaparte-Wyse e Mistral) Evocacion tanben d’un collòqui tengut a Cèus en octòbre sus la lexicografia (Gl. Bressand, Ph. Martel, P. Berengier e Josiana Ubaud) e de nòstras doas fèstas annadièras, a París (Santa Estela parisenca al jardin del Luxemborg, lo 25 de mai) e a Cèus. (Felibrejada dels 8 e 9 de junh)… …e de nòstres tres debats sus l’occitanisme : cooficialiat de la lenga, possible o impossible ? Bona o flaca qualitat de la lenga dins las revistas occitanas ? Contengut del « Manifèst occitanista » Lo rapòrt, se clavèt sus la volontat de trabalhar encara mai amb las doas autras associacions felibrencas parisencas .Tot sols sèm, ailàs, tròp flacs. Lo rapòrt foguèt adoptat a l’unanimitat. (cf .peça junta 1 en anèxa)

III - RAPÒRT FINANCIÈR

Susana Odin, clavaira, presentèt lo rapòrt financièr (cf.peça junta 2). Avèm un budget de pichòta associacion : 935,09 € amb resultats de 39,68 €. Cal dire qu’avèm editat una sola publicacion (107,29 € de fraisses d’edicion al luòc de 280,27 € l’an passat). Los escotissons, son de 660 € contra 820 € l’an passat pr’amor de la partença de plusiors socis, partença non compensada per d’arribadas. L’actiu es gaireben esstable en comparason amb lo de l’an passat : 5907,62 € en luòc de 5618,70 € . Avèm donc pas gaire de motius de nos carcanhar per nòstra santat financièra. Lo comissari dels comptes, Peire Galy, prepausèt de donar a la Dòna Odin quitús per sa gestion. Cò que faguèt l’amassada a l’unanimitat.

IV - DECISIONS DIVÈRSAS

1-Lo capiscòl evoquèt çò que poirián èstre las charradissas de la debuta de 2014 : G. Mathieu (sas darrièras poèsias), Stéphane Giocanti (C’était les Daudet) e Rémi Soulié (Joseph d’Arbaud, Paul Arène et le crépuscule des Dieux). Pus tard, Edmond Romieu poirà evocar lo cineasta Rouquier, autor de Farrebique e de Biquefarre. Lo conselh, que s’amassarà en decembre, preciserà las causas.

2- Coma l’an passat, nòstra associacion publicarà dins la colleccion « Los amics de la lenga d’Oc » al mens una brocadura. Benlèu la charradissa sabenta de Brigitte Saouma « Sant Bernat e los trobadors ». Lo conselh d’administracion es cargat de la sollicitar.

3- L’acamp general respondèt favorablament a las sollicitacions que faguèt lo secretari general a nostres escrivans, G. Matieu, J-P Bertrand e J.-F.Costes, de publicar sus nòstre siti « amilengoc@free.fr » al mens qualques unas de sas òbras ineditas..

4- L’acamp se declarèt d’acòrdi per contunhar d’aver de debats d’actualitat dins nòstras amassadas mesadièras. Ca que la, la question de la plaça dins l’òrdre del jorn es pausada. D’unes diguèron que caliá pas far esperar los conferencièrs e que, doncas, caliá botar lo debat d’actualitat en fin de sesilha. De veire en conselh d’administracion, caldrià pas que lo debat foguèsse sacrificat o se debanèsse sen qu’amb 2 o 3 participants…

En l’abséncia d’autras intervencions, l’acamp general se clavèt a 16 oras 30

SPIP | esqueleta | | Plan del sit | Seguir la vida del sit RSS 2.0