La Société des Félibres de Paris - Les Amis de la langue d’oc

2A- Gui Matieu : Una istorieta

dimècres 1r de genièr de 2014, per  Francis d’Abrigeon

L’ebenista dau fauborg Sant Antòni

A París lo fauborg Sant Antòni, que vai de la Bastilha a la Nacion, èra enjusqu’a quasiment la fin dau segle passat un quartier de mestieraus, mai que mai d’aquelei que trabalhan lo bòsc
Es aquí que, dau temps de la Revolucion, venguèt arribar lo famós batalhon de Marselhés que cantavan una cançon que li disèm dempuèi, e per aquò, “La Marseillaise”. Felix Gras faguèt d’aquela montada a París un roman remirable : “Lei roges dau Miegjorn”.
Pasmens, ben avant la Revolucion, aqueste fauborg aguèt sei moments de glòria.
Lo 31 de mai de 1725, jorn de la Fèsta Dieu, Anna Charlier, Dòna de la Fòssa, una frema que de lònga perdiá de sang, dempuèi vint ans, faguèt la procession en se tirassant sus lei genolhs e pregant Dieu de la garir. Veguèt seis emorragias miraculosament s’arrestar.
L’evesque, puèi lo Papa reconeiguèron oficialament qu’èra un miracle. E l’ostau d’aquela brava frema, a partir d’aquí, desempliguèt pas.
A-n aquela epòca lei Jansenistas fasián parlar d’elei, que sei posicions teologicas metián de garrolha dins la Glèisa. E un bèu jorn, quauqu’un de mai suspiciós que d’autres, demandèt a nòstra miraculada :
- Madama, vòstre òme, de fes que i’a, sariá pas Jansenista ?
- Mon òme, non ! Mon òme es ebenista !

Gui MATIEU

SPIP | esqueleta | | Plan del sit | Seguir la vida del sit RSS 2.0