RENDUT - COMPTE DE L’ACAMP GENERAL
DEL 17 DE NOVEMBRE DE 2012
L’acamp general annadièr estatutari de la Societat dels Felibres de París se debanèt lo dissabte 17 de novembre de 2012 a l’Universitat del Panthéon, sala 110, jos la presidéncia del capiscòl, Joan-Francés Costes (16 oras-17 oras 30)
Èran presents 7 sòcis del Conselh elegits de 2008 a 2011 e 10 sòcis fòra del Conselh demest los quaranta qu’avián pagat son escotisson. Quatre èran desencusats, que balhèron son poder al capiscòl. Atal, l’acamp poguèt valablament deliberar.
Secretari de sesilha : F d’Abrigeon, secretari general , que redigiguèt aquel rendut-compte.
I - RENOVELAMENT DEL CONSELH D’ADMINISTRACION
Tres sètis èran de renovelar : los de Susana ODIN, Gerard LIGOZAT e Daniel VIARGUES
S.Odin, G.Ligozat e D.Viargues foguèron tornar elegits.
Decisions presas a l’unanimitat.
Lo conselh, non modificat, es donc totjorn compausat atal :
9 sòcis elegits que son, dins l’òrdre alfabetic, :, F.d’Abrigeon, A.Birot, J-F.Costes, G.Ligozat, G.Mathieu, A.Quentin, S.Odin, D.Tourillon e D.Viargues
3 sòcis onoraris : lo majoral R.Rousset, lo majoral e rèire-capiscòl J.Fourié e lo rèire-capiscòl A.Armengaud.
S’amassarà lo 15 de decembre que ven a 14 oras per elegir lo burèu.
II - RAPÒRT D’ACTIVITAT
Lo secretari general Francés d’Abrigeon legiguèt lo rapòrt d’activitat per l’annada 2011-2012 qu’escriguèt : una evocacion de las set sesilhas mesadièras, amb charradissas de Remesi Soulié, Martin Motte, Peireta Berengier, Gui Mathieu (e Domitilla Vigneron), Andrièu Fulconis, Michel Alessio, Krystel Maurin, e Pèire Martial
Evocacion tanben de nòstras doas fèstas annadièras, a París (Santa Estela parisenca al jardin del Luxemborg, lo 12 de mai) e a Cèus. (Felibrejada dels 2 e 3 de junh) .
Per acabar, lo rapòrt evoquèt la participacion de mantes sòcis a las grandas manifestacions pan-occitanas (Anèm òc, Santa Estela de Sant-Iriès, Estivada de Rodés), nòstra activitat editoriala (doas novèlas publicacions) e la debuta de nòstre siti « amilengoc-free.fr ». Sus aqueste darrièr punt, totis los sòcis son arderosament sollicitats de mandar tèxtes, de tota mena, literatura o reaccions cap a l’actualitat.
Lo rapòrt, que clavèt sus un optimisme mesurat (capitada de la dictada occitana del 28 de genièr), foguèt adoptat sens oposicion. (cf .peça junta 1 en anèxa)
III - RAPÒRT FINANCIÈR
Susana Odin, clavaira, presentèt lo rapòrt financièr (cf.peça junta çai-sota).
Las despensas son mai fòrtas que l’an passat (1280,97 € contra 1201,21€) pr’amor de nòstra activitat editoriala.
Atal, per la tresenca annada consecutiva se dèu notar un deficit, mas mendre que l’an passat : 105,07 € contra 209,77 €.
Los escotissons, son de 820 € contra 605 € l’an passat pr’amor, non pas de l’augmentacion del nombre d’escotisaires, mas del montant de l’escotisson de 15 a 20 euros. L’actiu es leugierament inferior a l’actiu de l’an passat : 5867,94 € en lòc de 6077,71 € .
Avèm pas gaire de motius de nos carcanhar per nòstra santat financièra. Çò pensamentós es l’estagnacion del nombre de sòcis, evocada dins lo rapòrt moral.
Per acabar, lo comissari dels comptes, Peire Galy, prepausèt de donar a la Dòna Odin quitús per sa gestion. Cò que faguèt l’amassada a l’unanimitat.
IV - DECISIONS DIVÈRSAS
Lo capiscòl evoquèt çò que poirián èstre las charradissas a la debuta de 2013 : G.Mathieu (lo recuèlh de tèxtes que foguèt premiat a la Santa Estela de las Santas de 2011), Krystel Maurin (Fabre d’Olivet), Nicolas Quint (son manual Assimil revisat d’occitan) e una amiga d’A.Birot, nostra clavaira adjunta, (Sant Bernard e los trobadors). Lo conselh, que s’amassarà en decembre, establirà lo calendièr.
Coma dins los tres exercicis precedents, nòstra associacion publicarà dins la colleccion « Los amics de la lenga d’Oc » al mens doas brocaduras. D’en prumièr doas charradissas de Martin Motte (« Lo baile Suffren », e « La Provença maritima dins l’òbra de Mistral ») ; puèi una charradissa de Daniel Viargues : « La preséncia musulmana en Occitània dins lo Naut-Atge mejan ».
L’acamp general respondèt favorablament a las sollicitacions que faguèt lo secretari general dins son rapòrt moral. Valent a dire que nòstres sòcis escrivans botaràn sus lo site « Amilengoc » de còps que i a, una partida de lor òbra. Per començar, la relacion per J.-F.Costes del collòqui lexicografic d’octòbre tengut a Cèus lengadocian) e de textes de Joan-Peire Bertrand (lemosin) e de Gui Mathieu. (provençal).
Aprèp aver ausit informacions del secretari general e de la Clavaira, l’acamp decidiguèt de metre de l’òrdre dins la tièra dels sòcis e autres destinataris del Vira-Solelh. Aprèp una relança que farà Susana Odin al prèp de 6 sòcis (e que cal esperar capitada), serèm 46 e, de mai, lo butletin serà mandat en servici de premsa a dos individús e 19 associacions.
Una discutida foguèt menada sus la responsa de far o de non far cap a la letra del candidat Hollande publicada dins « Lou Felibrige-La Revisto » n°271 », especialament lo passatge seguent : « Je ne pense pas qu’il soit souhaitable de déclarer certaines langues co-officielles dans certaines régions : il s’agirait d’une formalité symbolique sans efficacité et contre-productive. L’ensemble de nos langues forme un patrimoine commun de tous les Français. La langue d’oc n’est pas une ressource d’intérêt régional mais un trésor national partagé ».
Lo secretari general diguèt que caliá reagir, estent que los arguments de la pluma del futur president son mai que flacs. D’autres sòcis diguèron que las regions occitanas son talament desoccitanisadas que voler una co-officialitat es pas res qu’un pantais. Segur que las resultas d’una proclamacion de co-oficialitat serián pas totas immediatas. Caldrà benlèu una generacion per far la reconquesta. E alavetz ? Cal saber çò que volèm : actar la mòrt d’una lenga, sens pus de transmission, reservada a una minoritat d’erudits, coma lo grec o lo latin, o far seriosament nòstre trabalh de « manteneires », amb l’ajuda de la lei ?
L’acamp general decidiguèt que lo secretari general mandariá una letra al Capolièr, que reproduirà son punt de vista personal que figura dins nòstre siti, e demandarà se lo Capolièr Mouttet pensa que sa demanda « Accepteriez-vous que les langues de chaque région soient considérées comme officielles avec le français ? » (Lou Felibrige-La Revisto n°269 p. 10) se deu d’èstre mantenguda.
En l’abséncia d’autras intervencions, l’acamp general se clavèt a 17 oras 30.
RSS 2.0