SOCIETAT DELS FELIBRES DE PARIS (ALO)
RENDUT - COMPTE DE L’ACAMP GENERAL
DEL DISSABTE 19 DE NOVEMBRE de 2022
L’acamp general se fasquèc coma èra previst aprèp la conferéncia de Brigitte Saouma, a Cèus. G. Ligozat, que representava le capiscòl, J-F Costes, presidiguèt. Èran presents uèit sòcis : Arlette Birot, Luc Dejean, Gerard Ligozat, Jacques Loubière, Guy Mathieu, Suzanne Odin, Daniel Viargues e Roger Vidal, e tres sòcis èran representats : Auguste Armengaud, Jean-François Costes e Bernard Quentin. Le president, Jean-François Costes, èra desencusat per causa de Covid. 21 sòcis avián pagat l’escotison per 2021-2022. Adoncas, le quorum de 8+3 = 11 sòcis èra averat e l’acamp se posquèc tenir normalament. Secretari de sesilha : Gerard Ligozat.
I - RENOVELAMENT DEL CONSELH D’ADMINISTRACION
Un sèti èra de renovelar ongan, le de Gui Mathieu
Fusquèc renovelat a l’unanimitat.
Alavetz, le conselh d’administracion novèl es le seguent :
- 6 sòcis elegits que son, dins l’òrdre alfabetic : Arletta Birot, Joan-Francés Costes, Gerard Ligozat, Gui Mathieu, Susana Odin e Daniel Viargues
-2 sòcis onoraris : le majoral e rèire-capiscòl Joan Fourié e le rèire-capiscòl August Armengaud.
L’AG decidiguèc a la majoritat de las votz que la prumièra amassada del conselh ambe, per òrdre del jorn, sen que elegir le Burèu, se tendriá uèi, a la fin del acamp general.
II - RAPÒRT D’ACTIVITAT _ Gérard Ligozat legisquèc le rapòrt d’activitat del capiscòl : « Las nòstras activitats se debanèren ambe las autras associacions felibrencas amigas dins l’encastre del Comitat felibrenc de Cèus.
Participam totjorn a la felibrejada de Cèus qu’agèc lòc, ongan, les 25 e 26 de junh de 2022. Les tèmas de la felibrejada èran le pintre Cézanne (« Paul Cézanne, peintre en Provence » : conferéncia del dissabte) e, le dimenge, les 200 ans de la naishença d’Aquiles Mir (30 de novembre de 1822), d’Escalas, pròchi Carcassona, un dels prumièrs majorals del Felibritge, en 1876, escrivan audenc que fondèc l’Escòla audenca del Felibritge en 1892, a Carcassona, que ne fusquèc le Capiscòl d’onor duscas la siu mòrt (la miu intervencion). De notar que totas las intervencions e la conferéncia son sul siti de la comuna de Cèus.
Organizèrem las conferéncias seguentas :
- le dissabte 15 de genièr de 2022 : La vida de Santa Enimia (poèma occitan de dos mil vèrses del sègle XIII) : un dels tèxtes mès vièlhs en occitan, per Laurent Gazet, doctorant en filologia romanica a l’Escòla practica dels nautis estudis, a la Sorbona ;
- le dissabte 12 de febrièr de 2022 : Las versions occitanas de l’Ancian Testament, per Brigitte Saouma, filosòfa, istoriana, sòcia de l’AIEO ;
- le dissabte 09 d’abrial : Louis DENIS de Valverane (1870, Manòsca–1943), pintre provençal, dessenhaire de benda dessenhada, illustrador, gravaire, autor d’un libre subre Mistral, Lou Maianen (H.-G. Peyre, 1936,186 p.), felibre de París, per Martin Motte, professor d’istòria ;
- le dissabte 8 d’octòbre : Trobador, un mestièr ? per Geneviève Brunel-Lobrichon, professora onorària de lenga d’Oc a la Sorbonne ;
¨- le dissabte 18 de novembre : Colbert, passionné de manuscrits médiévaux et d’œuvres d’art, per Brigitte Saouma.
Cal plan mercejar les conferencièrs que nos fasquèren intervencions remirablas d’una plan nauta tenguda.
Prepausi doas conferéncias per l’an que ven: la una, le dissabte 14 de genièr, serà la presentacion del siu libre « Renaissance du Sud, la grande épopée des littératures d’Oc », que ven de paréisher (Les Editions du Cerf, Paris, septembre 2022, 395 pages), per Stéphane Giocanti, l’autra, le dissabte de febrièr serà una vrespada poëtica animada per Gui Mathieu.
Per acabar, mercegi, coma totjorn, l’amic Ligozat que contunha de manténer le nòstre siti internet ambe vam.
Felicitam tanben, encara un autre còp, la Dòna Odin que vòl plan gerir les comptes de l’associacion e qu’ajuda al secretariat (mandadisses dels butletins, eca.)
Adoncas, èm totjorn plan vius e segudam coma podèm la dralha lobetenca.»
Aqueste rapòrt fusquèc adoptat a la majoritat de las votz.
III. RAPORT FINANCIER
Susana Odin, clavaira, presentèt lo rapòrt financier.
Ongan tanben, las resultas son pas bonas. Avèm totjorn una pèrda, es de 551,64 €, al luòc de 624,89 € l’an passat.
Li aguèt un escambi de proposicions per melhorar la situacion. L’estampatge e le mandadís del « Vira-Solelh » còsta car e se poiriá limitar le mandadís d’exemplars « papièr » als sòcis que n’an pas Internet.
Non agèrem cap activitat editoriala e les sòcis que paguèren son escotisson son 21. Las nòstras publicacions se son un chic vendudas, coma l’an passat.
L’escotisson demòra a 20 €.
L’amassada aprovèc la gestion de Susana Odin a la majoritat de las votz e la siu òbra (òsca !), en li demandant d’associar, quand siá necessari, A. Birot, la clavaira adjunta, a la siu òbra.
Cal precisar que cercam totjorn qualquns per remplaçar pauc a pauc la nòstra clavaira.
IV. QUESTIONS DIVERSAS
Le president prepausa (es una idèa de Susana Odin) de cambiar le sèti social de l’associacion que seriá transferit a Tolosa. L’acamp discutèt la proposicion e decidiguèt de donar son aprobacion sota la condicion qu’aquel cambiament siá en acòrdi ambe la legislacion.
Gerard Ligozat, administrator del nòstre siti amilengoc@free.fr, perseguís la siu òbra remirabla.
Gerard Ligozat rapelèt que les sòcis podián mandar tèxtes per que sián publicats sul siti. Mercegèt Gui Mathieu e Daniel Viargues que pausavan la question de saupre s’aquò èra totjorn possible, e los encorajèt a o far.
Daniel Viargues prepausèt que son trabalh recent sul Creissent fusquèsse publicat coma publicacion dels Amics de la lenga d’òc.
Le president decidiguèt de clavar l’acamp general a 17 o 30.
RSS 2.0