LAS ACTIVITATS DE LA SFP-ALO DINS L’ANNADA 2008-2009
L’annada 2008-2009 començèt per l’acamp general annadièr que se tenguèt lo dissabte 11 d’octòbre de 2008 jos la presidéncia del nòstre capiscòl, Joan-Francés Costes. 19 sòcis èran presents e d’autres representats demest lo quarantenat à jorn de lor escotisson.
Foguèron adoptats à l’unanimitat lo rapòrt d’activitat de l’annada 2007-2008, redigit e presentat per Francés d’Abrigeon, vice-capiscòl, e lo rapòrt financièr presentat per Suzana Odin, clavaira de la societat.
Lo nombre de sòcis cotizants n’a totjorn pas crescut mas, pr’amor nòstra gestion clarvesenta, las recèptas son encara superioras a las despensas (de mai de 250 èuros).
Lo 15 de novembre, Joan Feuillet, lingüista e ensenhaire presentèt « L’occitan de viva votz (dialècte lengadocian) ».S’agís d’un manual (libre e CD) per aprene una prononciacion normalizada de l’occitan. Aprèp la presentacion, J.F. nos faguèt faire exercicis. Los sòcis lengadocians aprecièron fòrça aquel trabalh, maldespièch de las diferéncias entre jos-dialèctes . Per exemple, tot lo monde possedís pas naturalament lo R apical mas tot lo monde es d’acòrdi per causir aquèla nòrma. Volém pas èstre de patesejaires ! Naturalament, respectam l’identitat dels grands dialèctes coma lo provençal qu’es pas concernit per aquel obratge.
La nòstra majorala provençala, Peireta Berengier faguèt sa charradissa annadièra a la sesilha del 13 de decembre organizada per un còp amb « Los Miegjornals de Scèus » e la « Velhada d’Auvernha » ;
Lo tèma èra original : cap de Mireio que deurà esperar la fin de l’annada per èstre celebrada ! Cap de literatura o solament fòrça indirectament amb l’evocacion dels ligams de Frederi Mistral amb Mariani, l’inventaire d’una liquor provençala, uèi desapareguda, un pauc l’aujòla del Coca cola.
Aprèp sa charradissa, P.Berengièr espingolèt la cigala de mèstre d’òbra del Felibritge sul pitre de nòstre capiscòl, Joan-Francés Costes. Autra presėncia tradicionala, per començar l’annada civila de 2009, lo 10 de genièr, nòstre sòci, Gui Mathieu, nos legiguèt pas mens de 31 òbras de sa composicion, cortetas o mai longas, gaireben totas en occitan provençal. E tanben cinq reviradas, notament d’Ives Bonnefoy, benlèu lo mai famós poèta francés vivent, e d’André Laude .
Lo 7 de febrièr, Nicolas Quint, lingüista, venguèt à nòstra sesilha per nos presentar lo parlar nòrd-occitan de la Marcha, lo marchés. N.Quint faguèt son memòri de mestrisa subre aqueste parlar. Lo marchés es la zòna del creissent, un airal lingüistic que foguèt temps negligit pels cercaires perque non èra considerat coma d’occitan blos. N.Quint nos demostrèt qu’aqueste parlar èra demorat plan viu. Nos donèt qualques caracteristicas morfò-sintaxicas del marchés.
Lo 14 de març , nòstre sòci Gerard Ligozat nos presentèt un autre dialècte nòrd-occitan, lo vivarés-alpin o puslèu un metòde per aprene aquèla forma d’occitan en quinze leiçons (« Aprenem l’occitan vivaro-alpin »). Començèt per la lectura d’un tèxt d’August Thouard (Embrun, Nautas-Alpas) en notant las qualques diferéncias amb l’occitan referencial. Una parlardissa qu’interessèt talament lo monde (especialament los natius de las Alpas) que manquèt de se transformar tal coma un « happening », en un debat un pauc desordenat. Al mens podèm dire doas causas : nòstres orators an un public que se languís pas e la mala reputacion del Felibritge (lo « tutu-panpan ») es de denegar en çò nòstre !
Lo 4 d’abrial, lo professor Martin Motte nos presentèt Louis Denis-Valverane (1870-1943), pintre provençal de Manòsca, amic de Mistral, autor d’un libre subre nòstre Mèstre a totis, « Lou Maïanen » (1936). Duscas ara, se parlava sustot del Felibritge e de la literatura. Ambe L.Denis-Valverane, M.Motte evoquèt las relacions entre lo Felibritge e la pintura. I agèt dos tèmas dins la conferéncia : la reivendicacion identitària del pintre e l’imatjariá de L.Denis-Valverane.
Lo 16 de mai, per la tradicionala Santa Estela parisenca, nos tornèrem trobar al Luxemborg, al pè de l’estatua de la mitica e pasmens cara Clamença Isaura. Qualques poèmas ancians o inedits foguèron dichs.
La taulejada annadièra se tenguèt dins un restaurant pròche del Luxembourg dins un ambient frairenal e amistós, coma totjorn.
La felibrejada de Cèus, (13 e 14 de Junh) celebrèt Mireio, lo cap-d’òbra de Mistral escrich fa 150 ans. Un rendut-compte es paregut dins lo jornal municipal de la ciutat felibrenca de l’Isla- de-França e pareisserà dins « La revisto. »
La vesprada literària , fòrça rica, acampèt pas mens de 5 conferencièrs. De notar la preséncia de dos estrangièrs, sòcis del Felibritge, S.Niggeler (Soïssa) e S.Björkman (Suècia).
Lo ser, los felibres e los Sceans poguèron entendre o tornar entendre la famosa interpretacion del drama a doas votz par lo teatre de Gelàs (en francés, malurosament).
Lo dimenge 14, de notar la lectura d’extrachs de l’epopèia en quatòrze lengas e la remesa de las jòias dels jòcs florals. Nòstres sòcis, Ives-Enric Allard e Gui Mathieu foguèron demest los premiats. Òsca !
Ara comença una annada novèla de nòstra societat mai que centen ària. Coma ditz la devisa dels Paíes-Basses « Nous maintiendrons », amb modestia (sèm vertadierament tròp pauc) mas amb coratge. 2009 o 2010, annada de la lei prometida per lo Poder nacional ? Volèm lo creire. Seriá una bèla ajuda per nòstra causa !
RSS 2.0